.
..Zena Superba
son chi, veddo a Lanterna
ti ê sempre a maexima
coxì in te l'apparenza
solo e tö voxi
me pâ
nu ghe son ciù
.
Chi végne a Zena
doppo tanti anni
e cian cianin o s'adéntra in ti caroggi
no sente ciù d'e comari i' sbrâggi
e o ciatellâ mentre che sténdan e miànde
Zena a l'é deventâ sempre ciù grande
Se véddan facce neigre, facce gialle
e manco l'ombra de o parlâ zeneze
te câzzan lì pe' tæra êggi e balle
mentre ti çerchi
a bûttega che no gh'é
epüre a l'ea lì , proprio derë Via Pré
.
No gh'é ciù
ödô de piscio ch' attanàggia
nu ghe ciù
ün càn che in scia mûagia o stràggia
aloa
ti pîggi o vîco co va drîto a o mâ
pe respiâ quell'äia de n'a vòtta
ma
o porto antigo o l'è deventôu moderno
i pésci son in te gàgge , comme öxelli
e se paga o bigetto pe' amiâ
o besugo lì drento co bocchezza
e o custode che o cü o ghe nettezza
Comme voriæ sentïi
e tô voxi antìghe
do latoné co passa porta a porta
donneeeeee
vegnïi, vegnïi , pe affiâ i cötelli
pe ün cìtto torniàn sci lûxenti e belli
.
Donde l'è o pescôu co a sö picàggia
a tiâ o carretto sgangerôu
co sbrâggia
ancioooooooooeeeeeee
son vive , e frescheeeeeeeeee
bogheeeeeeee, porpiiiiiiiiiii
vegniiiiiiii , donneeeeee, vegniiiiiiiiiii
Son voxi
che no se séntan ciù
manco i figêu
Anche e vegie bagasce no ghe son
son morte
opüre anæte za in penscion
ôa ghe son moldave che an za dæto
qualche moggê baldracca a colaxion
agratis no gh'é nïnte pe nisciün
e i bassi de bûtteghe trasfurmae
.
Zena Superba
dìmme, donde t'ae
se no fïse pe' o profúmmo di frisciêu
pe' a fainâ
da mangiâ in ta carta stràssa
pe ûn tocco
de fûgassa
mi
no te riconosciae
E pe no êze scangiâ
pe' n'a foresta
a strangosciùn
mentre cammino canto
♫
belin, belin, belin
me n'imbelìno
♫
Mi
son zeneze
son de riso ræo
e strenzo i denti
e parlo
sempre
ciæo
.